【Emily】機場櫻花園擴展 觀賞期有一個月

【明報專訊】日本嘅當地櫻花季預計下月先開始，如果唔想等咁耐，不妨考慮去香港機場櫻花園新擴展嘅「櫻花海岸」觀賞「好運來」櫻花。機管局機場運行執行總監姚兆聰話，園區即日起免費開放，每日開放到夜晚8點，連同舊園區嘅櫻花下月開花，賞花期約有一個月。

第三年種植「好運來」櫻花嘅櫻花園已經擴建至赤鱲角南路海濱一帶，姚兆聰話，新建嘅櫻花海岸現已有30棵櫻花盛開，海岸除咗有躺椅同櫻花主題步道，仲有大片人造草坪畀市民休憩，夜晚仲會有唔同色彩嘅射燈映襯添！

姚兆聰仲話，舊年有12萬人次嚟賞櫻，但好多人反映花期只得一兩個禮拜，所以為咗等大家有更長時間賞花，種植喺櫻花海岸嘅櫻花會早啲開花，大概3月中就到舊園區嘅櫻花盛開，所以今次整個開花期有一個月。