【Emily】LIV高球賽煞科 陳國基葉劉觀戰

【明報專訊】踏入香港盛事「超級三月」，噚日LIV高爾夫球巡迴賽上演最後一日賽事，吸引一眾名人政要到場觀賽，包括政務司長陳國基、行會召集人葉劉淑儀、行會成員兼立法會議員林健鋒、立法會主席梁君彥。

陳國基話留意到，除咗外國球手，唔少遊客特登來港觀賽，佢覺得呢類國際盛事絕對有助「說好香港故事」，畀旅客親身感受香港魅力。佢又讚主辦加入表演、親子玩樂設施、小食檔，令粉嶺高球場變身盛大嘅嘉年華，吸引大批市民帶小朋友入場。文體旅局長羅淑佩就話現場氣氛輕鬆，有別於嚴肅賽事，並透露同主辦方傾緊長期合作，雙方合作意願好強烈，好接近達成共識。

睇完國際球賽，陳國基晏晝就去戲院同長者、共創明「Teen」學員、「社區客廳」會員睇國產動畫《哪吒之魔童鬧海》，佢大讚動畫生動，令年輕人、海外朋友了解中國神話嘅傳統文化精粹，有助提升國家文化軟實力，仲話要學習哪吒挑戰自我、鍥而不捨嘅精神。