【Emily】李家超話政府似哪吒無畏無懼

【明報專訊】內地動畫電影《哪吒2之魔童鬧海》票房佳，特首李家超早前與太太林麗嬋一齊到戲院捧場。佢喺facebook話，哪吒面對困境時不屈無懼，而香港近年亦大力改革，認為哪吒精神激勵大家「繼續披荊斬棘，踏出自己的路」。李家超希望日後更多港產片同樣走向世界，傳揚香港特色與魅力。

同太太捧《哪吒2》場

李家超話《哪吒2》反映內地動畫製作嘅技術水平快速發展，令全球感受到中華文化與中國故事嘅魅力。佢引用主角哪吒嘅對白「若前方無路，我便踏出一條路」，指出佢與政府近年同樣無畏無懼，逐個擊破一件件擱置已久嘅難題，展現「破局思維」。

民建聯、工聯會、新民黨等政團繼續喺地區包場畀市民觀賞《哪吒2》，立法會議員陳克勤、李世榮、容海恩等噚日分別同街坊一齊睇戲。民建聯陳克勤話好多市民讚賞《哪吒2》，反映內地創意產業不斷進步發展，成績有目共睹。