【Emily】科大為嫦八研月面作業機械人 雙臂好講究

【明報專訊】國家自2004年啟動名為「嫦娥工程」嘅探月工程，逐步實現奔月夢想。探月工程現已去到第四期，嫦娥七號同八號探測器仲喺研發當中，香港喺呢項重大國家任務中亦佔一席位，香港科技大學獲國家航天局委任研發一款多功能月面作業機械人暨可移動充電站，將會隨嫦娥八號探測器登月，作科學探測。

科大太空科學與技術研究院院長于宏宇接受政府新聞網訪問時話，呢個機械人配備雙機械臂，用嚟佈置同安裝儀器、採集月面樣品等。佢話要精密控制機械臂好困難，過程中要保證不能碰觸其他儀器，走到特定位置也要求一定精準度。

于宏宇話，研究團隊因應月面嘅低重力同惡劣環境，開發一個軟件，確保機械人喺操作過程中，可根據環境變化自主改變姿勢同操作功能。機械人可實時感應月球嘅地貌，規劃行走路線，又要應付月面嘅極端溫度，設計時要克服好多挑戰。

除咗探月，機械人另一特點係配置咗太陽能電池，能以移動充電站形式，為其他月面設備無線充電。創新科技及工業局長孫東話，政府大力支持本地大學和科研機構做同航天科技有關嘅研究，為國家建設航天強國作出貢獻。