【Emily】立會主席突消失 鄧家彪O嘴窒一窒

【明報專訊】立法會噚日大會出現罕見「蝦碌」場面，近下晝5點半主席梁君彥如常主持會議，審議並表決《保護關鍵基礎設施（電腦系統）條例草案》後，隨即審議《2024年空氣污染管制（修訂）條例草案》，喺5點36分，佢叫法案委員會主席鄧家彪報告審議情况，鄧家彪於是企起身講嘢，講咗大概1分鐘，鄧家彪突然「O嘴」停頓發言，仲頭擰擰一臉茫然，然後尷尬一笑繼續發言，其他在場議員亦你眼望我眼，唔知發生咩事。

原來當時鄧家彪望向主席位，發現主席位無人在席。大概兩分鐘後，見到代主席李慧琼匆匆趕到主席位主持會議。

梁君彥離開一陣回來 有料生理需要

鄧家彪話，佢做咗7年議員，都係首次喺開會時抬頭見唔到主席，講笑話當時「不知所措」，先至會「O嘴」。有議員就話，當時發現主席位懸空，即刻到會議廳外搵李慧琼返嚟主持會議，話呢次蝦碌真係未見過，因為以往主席中途休息，同代主席會「無縫交接」。

有議會中人就話，梁君彥噚日長時間直踩，保護關鍵基礎設施條例審議咗4個鐘，可能梁需要去解決生理需要。事件過咗一陣就見番梁君彥返回會議室，精精奕奕繼續主持會議。