【Emily】廢料棄街投訴6日無人理 田北辰：離晒譜

【明報專訊】實政圓桌立法會議員田北辰前晚喺網上出帖發牢騷，原因喺屋企附近有人喺行人路旁棄置建築廢料，佢話以市民身分致電食環署投訴熱線及1823，等咗6日都無人理，噚日朝早出門口時見到啲廢物原封不動。食環署見到，噚日朝早即刻有人搵田二少嘅助手莊豪鋒詢問垃圾位置，到咗下晝有部門搵人清理乾淨。

話熱線應將個案轉介相關部門

田二少話，事件係離晒大譜，佢上周五外出行經一個垃圾收集站，有人無公德心，喺垃圾站旁棄置大量建築廢料，而站旁仲貼咗告示印住「在本收集站外非法棄置垃圾，會被檢控」。佢話事件未必關食環署事，因為按正常情况，食環署負責清理垃圾，建築廢料係另一部門負責，但一般市民唔會識分，熱線應該將個案轉介去相關部門，唔應該等成個禮拜都無人理。田二少話，今次呢啲睇落似係建築廢料，但如果膠袋內放咗垃圾，過咗咁多日都發臭。