【Emily】經民聯倡降企業利得稅 設基金搶企業搶人才

【明報專訊】全國兩會上周喺北京閉幕，經民聯噚日發表專題報告，促請政府落實「兩會精神」，提出多項建議吸引投資、激活股市及穩定樓市。吸引投資方面，佢哋建議下調企業標準利得稅率至15%，成立專項「搶企業、搶人才」基金，甄選業內龍頭公司或具潛質嘅初創企業提供補貼，並向合資格人才提供生活補助。

樓市及股市方面，經民聯提議將徵收100元物業印花稅嘅價值上限進一步提高至500萬元，並將股票印花稅減至0.05%；又建議發展債市，包括主動邀請內地省市來港發行離岸人民幣地方政府債券。

今年中央政府工作報告要求香港「深化國際交往合作」，全國人代、立法會議員梁美芬話香港要繼續同歐美人民交往，社會要持開放態度，強調對方政府對港政策唔友好，都唔代表民眾嘅想法。

港澳辦主任夏寶龍喺北京接見港區全國政協委員時，要求各人「落場踢波」、「做運動員」。盧偉國話經民聯一直喺工商專業界別同議會努力「踢波」，「喺立法會最艱難嘅時候，好多人踢茅波嘅時候，我哋呢班就係頂住茅波嘅球員」。