【Emily】熊貓三仔乸今起同框亮相 盈盈將湊仔女到兩三歲 樂樂一支公

【明報專訊】港產大熊貓龍鳳胎「家姐」同「細佬」今日起終於同媽咪盈盈喺展館「大熊貓之旅」同框亮相。海洋公園噚日率先請傳媒一睹天倫樂，盈盈一入場，黐身嘅細佬即刻去搵媽咪，攬住媽咪打鬧，之後又通處跑；家姐就比較靜，喺樹上「躺平」，要盈盈拉番落地。兩姊弟仲圍住媽咪飲奶。

今日開始，盈盈會加入兩姊弟，喺展館中間位置一齊住。園方話家姐細佬已經夠成熟同媽咪一齊亮相，盈盈亦有能力同時照顧兩姊弟，直到佢哋兩三歲，就會逐漸過獨立生活。爸爸樂樂就會繼續獨居，因為大熊貓係獨居動物，雄性熊貓一般唔會照顧子女嘅。

延開放時間 派籌限時觀賞

展區開放時間亦會延長到朝早10點至下晝4點半，海洋公園會派「時間票」，每日約3000張，每20分鐘一節，每次40至50人同時觀賞。訪客可按指定時段入館探三母子，再去館內另一區探樂樂，不過喺三母子「屋企」前只可以駐足約3分鐘。

川金絲猴BB等市民選名

園方另外宣布，將為1月出世嘅川金絲猴BB改名，稍後會喺社交平台公布候選名單，畀市民投選心水名字。