【Emily】接受盧寵茂訪問 何柱國：食煙似做賊

【明報專訊】全國政協前常委、商人何柱國上個月喺電台節目自爆患肺癌後康復，仲勸朋友戒煙，之後醫衛局長盧寵茂喺社交平台「表揚」佢，早排盧局長更加親身上陣，訪問何柱國嘅戒煙經驗。何柱國喺節目形容，以前食煙係「威水嘅形象」，今日已風水輪流轉，「由英雄變狗熊」，食支煙好似做賊咁。

拍戒煙宣傳片

話做化療似貓冇咗8條命

曾經營煙草生意嘅何柱國早前出席商台節目《光明頂》，講到呢世人最唔鍾意一個人叫盧寵茂，覺得食煙係佢嘅自由，但後來諗番要感謝盧，因為治療肺癌嘅過程好辛苦。噚日何柱國就同佢口中「呢世人最唔鍾意」嘅盧局長合作，拍攝一個宣傳戒煙節目對談。

問到如果可以再揀，會唔會唔食煙或者早啲戒煙，何柱國話會揀早啲戒煙，佢話自己16歲開始食煙，「食煙仔係一個形象，係威水嘅形象，今日風水輪流轉，孫仔、細路哥（仔女）見到你叫你唔好食煙，你由英雄變成狗熊，食支煙仔要走出門口避，好似做賊咁樣，既然知道唔好，點解要做呢？」

佢又再提到，治療時做化療、電療，過程好辛苦，特別係化療，形容「好似貓有9條命都去咗8條」。