【Emily】煤氣推爐具立體貼紙 助失明者辨位置火力

【明報專訊】香港失明人協進會副會長陳志剛失明20年，用煤氣爐煮食，佢聽聲就能夠辨別到火力，但對於啱啱失明嘅人嚟講，掌握爐具操作就唔係咁易。煤氣公司設計一套兩組嘅煮食安全立體貼紙，失明者靠觸摸貼紙，可以辨別爐頭中心位置同爐具開關位置。陳志剛試用後覺得好實用，相信呢套貼紙可以幫到啱啱失明嘅人盡快掌握爐具操作，適應視障生活。

避點字門檻 採凹凸簡單符號

煤氣公司研製嘅煮食安全立體貼紙一套兩組，其中爐頭定位貼紙有兩個大三角形符號，使用者可以透過兩個符號知道爐頭中心位置；另一組係火力控制貼紙，包括印有「-」、「…」及「.」嘅凹凸觸感符號，3個都貼喺爐具嘅開關掣，代表熄火、大火同細火嘅位置。

煤氣公司產品開發總經理李浩良話，早喺研發階段邀請盲人輔導會嘅專家同長者畀建議，因為了解到唔係所有視障者都識點字，設計時採用簡單直接嘅符號，希望更易掌握。煤氣公司嚟緊會同志願組織合作，免費派發貼紙畀有需要者試用。如果市民有需要，都可以喺本月下旬去各間TGC煤氣客戶中心以25元購買。