【Emily】南丫電廠錄30鳥類 大白鷺磯鷸首現身

【明報專訊】發電廠唔一定污煙瘴氣，港燈由2011年開始，每隔5至6年都會為南丫電廠做鳥類調查，以推行維護生物措施。港燈董事總經理鄭祖瀛日前喺「綠遊香港」今年首個線上遊任導賞員，佢話電廠嘅「鳥類調查組」正做2024至2025年度調查，目前喺電廠範圍內錄得30種鳥類，包括留鳥、冬候鳥及過境遷徙鳥，更首次發現大白鷺、烏灰鶇、原鴿和磯鷸嘅蹤迹；調查亦再次發現罕有嘅冬候鳥紅尾伯勞，話咁顯示發電廠亦適合鳥類棲息。

南丫發電廠成為鳥類生境，鄭祖瀛話全憑多年喺電廠推行環保措施，例如持續種植本土樹種，改善空氣質素，為雀鳥提供食物和棲息之所。「綠遊香港」係港燈與長春社合辦嘅環保教育項目，2005年推行至今，先後於港島同南丫島開發咗12條生態文物徑，今年首場公眾線上遊已於上周六（22日）舉行，未來有多項導賞活動可以參加。