【Emily】司法機構開LinkedIn 不設留言

【明報專訊】本港法庭近年嘗試加強數碼化，司法機構噚日推出專業人士多用嘅社交網站LinkedIn專頁，半日內都有200幾人追蹤。司法機構第一個帖文就用英文介紹，終審法院將推行為期兩年嘅現場直播先導計劃，大律師公會正副主席毛樂禮、薛日華都有轉載。

司法機構話，將透過專頁分享最新動態，包括重要嘅法庭判決書，同其他司法管轄區專頁交流活動等資料，及提升工作透明度。唔少地區法院已登陸社交網站多時，例如韓國及新加坡最高法院分別於2011年及2013年開facebook，兩個法院亦都有開Instagram、X、YouTube等，內地最高人民法院有開微博同微信。

睇番香港司法機構LinkedIn專頁，就熄咗帖文留言功能，司法機構解釋，為咗維護專業同保持互相尊重嘅環境而咁做，令大家可以聚焦番內容，防止虛假資訊同無幫助嘅討論。