【Emily】港登公共交通「世一」 頭5位都喺亞洲

【明報專訊】英國旅遊雜誌《Time Out》噚日公布2025年「最佳公共交通系統」調查結果，香港喺50多個國家或地區中脫穎而出排名榜首，成為「世一」。調查訪問咗50多個國家同城市超過1.85萬名居民，邀請佢哋對自己城市嘅公共交通系統評分，結果排頭5位嘅分別係香港、上海、北京、迪拜同台北，全部都係亞洲城市，力壓英國倫敦、瑞士蘇黎世、波蘭華沙等。

報道話，對香港成為全球最佳公共交通城市不感意外，稱港鐵有10條線路貫通港九新界，而且接駁內地邊境；巴士同小巴有冷氣，雙層電車亦非常有特色。受訪香港市民中98%都對香港公共交通有正面評價。

運輸及物流局長陳美寶噚日喺facebook出帖回應，話感謝各個公共交通營辦商提供高效、便捷服務，令市民正評滿滿，希望藉此機會邀請世界各地旅客來港，感受香港世一嘅公共交通服務。