【Emily】馬龍《桃花源》 日書畫展獲金賞

【明報專訊】香港著名漫畫兼水墨畫家馬龍（另有筆名馬星原）最近參加日本NPO法人國際書畫交流會展，其作品《桃花源》獲頒「金賞」。馬星原同Emily講，不論畫家定係其他藝術家都係創作者，當然鍾意自己創作嘅作品受到欣賞同肯定，尤其受德高望重、已經80幾歲嘅知名書法家兼交流會會長福田秀仙親自點評，覺得鼓舞。

馬星原同Emily講解作品概念，話《桃花源》起源於10年前，佢好鍾意《桃花源記》嘅故事，因為「人人都嚮往一個『避秦』的烏托邦」，3幅畫分別體現漁夫進入桃花源嘅經歷，第一幅係「漁人緣溪行，忽逢桃花林」，第二幅講漁夫進入桃花林，一路上「落英繽紛」，最後一幅漁夫到咗「林盡水源」見到一座山，山有「小口」，漁夫探頭探腦，想從桃花源入面望向外邊。交流會展今年辦到第26屆，即日到今個月尾喺東京都美術館展出超過500幅水彩畫、水墨畫、油彩畫等作品，免費對外開放。