【Emily】灣區專組委KOL 張國鈞：更貼地

【明報專訊】律政司「粵港澳大灣區專責小組」今個月初委任5個新成員，包括無法律背景、住喺深圳嘅港人KOL「西DorSi」謝承益。小組主席、律政司副司長張國鈞接受傳媒訪問時解畫，話希望透過邀請了解內地情况嘅港人加入，制訂措施時更「貼地」，日後邀請諮詢架構成員亦可「更跳脫」。

「西DorSi」34萬人追隨

「西DorSi」謝承益為專責小組唯一唔係來自法律界、但長居內地嘅成員，佢嘅YouTube頻道約有34萬人訂閱。張國鈞話，相信謝承益可以反映最真實嘅意見，「搵佢入嚟，其實我哋可以聽到成日跟蹤住佢嘅30幾萬人嘅意見，我哋聽意見更加有效率，範圍更廣更深」。

謝承益話2020年底搬去深圳住，港人喺內地遇到各種問題同困難都未必識點樣處理，希望透過自身經歷提出意見，反映對法律「一竅不通」嘅市民有咩想法。

專責小組2023年成立，由法律界、學者、商界、內地港人代表及律政司代表組成，旨在深化大灣區便利惠民互利合作，推進大灣區發展同建設。