【Emily】盛事多 巴塞爾CEO：香港有番自信

【明報專訊】中美貿易戰範圍之大，文藝傳媒都關注。舊年喺美國紐約開畫廊嘅亞洲文化協會主席姚金昌玲（Daphne） 同Emily講，美國當地對中國藝術文化相當有興趣，有唔少規模稍細嘅博物館本身已有中國古典藏品，有興趣收藏或展出當代藝術作品「做對話」。佢話美國藝術界都有諗當地政局同影響，但目前未係好受影響，笑言未必好多人係總統特朗普嘅擁躉。

雖然對華關稅暫時豁免藝術作品，Daphne話聽聞有拍賣行話都有啲影響，買家都會「諗多一諗」先買，自己畫廊試過運作品去美國時都要交關稅。

香港呢個禮拜接連有大型文藝活動，巴塞爾藝術展行政總裁Noah Horowitz喺中美交流基金會論壇話，香港喺疫情期間與世隔絕，好多人對香港未來有疑問，𠵱家「香港有番自信」。

Daphne話香港40年前真係「文化沙漠」，自己同媽媽、藝倡畫廊創辦人金董建平以前好難先說服到收藏家明白作品嘅價值。

佢話當時甚至有個笑話，話如果禮拜日要避暑，最好去香港藝術館涼冷氣，因為無人，但𠵱家就好唔同喇。