【Emily】數碼港「數碼科技體驗館」開幕 有AI醫生

【明報專訊】香港近年大力推動創科產業，數碼港噚日起推出全新嘅「數碼科技體驗館」，展示多項涉及人工智能、區塊鏈等產品和方案，涵蓋教育、醫療、智慧城市等領域，例如「AI私人醫生平台」會提供健康諮詢、醫療報告解讀等服務；「腦動學」會將實體道具同系統連接，令認知障礙症患者喺玩緊簡單遊戲時做認知訓練同數據分析等。呢堆展品全部來自17間數碼港內嘅企業。

數碼科技體驗館即日起向企業同公眾開放，館內設有「提升效率」、「安全」、「互動體驗區」等三大展區，未來亦會持續定期更新體驗館內嘅展品。數碼港主席陳細明噚日喺開幕禮話，數碼港有超過2200間企業，並積極開發緊創新嘅產品同方案，認為當中嘅意念同產品值得獲更多人認識，所以希望透過體驗館，為社會各界提供一個探索、體驗同應用創新科技嘅平台，提高大眾對香港創科發展嘅關注同了解。