【Emily】顧客稱被屈食霸王餐 鴻星公開道歉

【明報專訊】社交平台Threads近日流傳一則帖文，發帖人分享上月29日幫襯食肆「鴻星中菜」時話遭餐廳經理、侍應誣衊「食霸王餐」。「鴻星集團」噚日喺facebook發文向事主公開道歉，就佢當日「用餐體驗不如理想」致歉，並承諾加強團隊培訓同監督，杜絕同類事件發生。

事主喺4月29日發文，話當日與同事去太子MOKO新世紀廣場嘅鴻星中菜食晏晝飯，用膳至埋單期間，先後畀餐廳經理同兩名侍應指控其喺兩個星期前走數。事主話，佢當時表明當日係第一次幫襯，並要求睇閉路電視，但餐廳就以私隱為由拒絕。事主最終報警，警察並無到場，只係透過電話調解，最後餐廳經理亦無道歉，只係話一個禮拜內再畀答覆佢。

事主斥損名譽 道歉補救唔到

事主喺帖文中表示，食餐飯要被人冤枉已經覺得「好嬲、好唔開心、好無奈」，加上當日同新同事第一次食飯，「是但一個真係以為我有做，都好影響我名譽」，批評食肆「就算點道歉都好，都補救唔到」。