【Emily】法國五月《幻夜舞會》大館呈獻

【明報專訊】腳踩高蹺、頭頂仿製電燈同蠟燭裝飾，隨住法語樂曲播放，一眾舞者喺夜幕中點亮咗中環「大館」檢閱廣場，恍如帶領觀眾返番去19世紀末「美好年代」嘅法國街頭。

受法國已故印象派畫家雷諾阿同德加嘅畫作啟發，法國藝團Remue Ménage創辦人暨藝術總監Loïc Delacroix同秘魯藝術家Veronica Endo，喺大館呈獻集視覺藝術、雜技、舞蹈同木偶表演於一身嘅《幻夜舞會》，表演會喺晚上6點同7點半上演，去到本月18號都有得睇，觀眾可以免費入場欣賞。

呢項表演係法國五月藝術節其中一個節目，今年法國五月以「法藝狂歡」為主題，期望讓參與者認識法國藝文瑰寶，同時慶祝港法兩地嘅文化交流。逾百項活動喺3月至6月期間舉行，包括由M+博物館及巴黎國立畢加索藝術館共同策劃嘅展覽「畢加索——與亞洲對話」等。