【Emily】環團政總請願 促體育園推重用杯

【明報專訊】環團綠色和平噚日去政府總部，向文體旅局長請願，呼籲喺啟德體育園設立重用杯系統，並趁英超球隊利物浦、阿仙奴同熱刺7月底喺啟德比賽及舉行全運會嘅契機，協助園方落實環保措施。

綠色和平話早前Coldplay演唱會向觀眾提供可重用LED手帶，完場後觀眾有序交回，證明重用概念切實可行，建議政府撥款1000萬元，半數用嚟買杯同設立清洗系統，另一半就用嚟將系統擴展至其他政府場地，將重用杯變為恆常措施。

綠色和平認為，早前政府無為園方營運階段設減廢目標，欖球總會曾希望喺七欖用自家重用杯但唔成事，估計七欖3日賽事派咗51萬隻即棄杯。佢哋又話，德甲足球聯賽所有球會主場都要提供重用杯，英超就有過半主場咁做，其中阿仙奴8年前已喺主場提供重用杯，至今慳咗至少50萬隻即棄杯。