【Emily】議員「出巡」觀塘 睇智能製衣食蛋撻王

【明報專訊】立法會鞏固及促進九龍東第二核心商業區相關政策事宜小組委員會，噚日去觀塘兩間本地企業參觀，一間係紡織製衣公司，另一間係蛋撻王，睇佢哋點用新科技，當然都有試食下。委員會主席鄧家彪建議政府加強資訊流通，就樓高、承重、交通配套各方面，做好企業同工商廈嘅配對，令成個觀塘嘅工商業可以升級轉型。

佢哋參觀嘅本地紡織製衣公司Sew Solution獲「再工業化資助計劃」撥款1500萬元，建立針織毛衣智能生產線，噚日仲即場示範點樣生產一件成衣。蛋撻王就有多部專門製作蛋撻皮、包餡、流心月餅等嘅機器，同時做到標準化生產同自動管理。

委員陳沛良話𠵱家外圍政經環境唔明朗，本地企業有好多挑戰，希望政府持續支持本地企業轉型升級。委員黃錦輝就希望進一步釋放工廈潛力，配合政策支援，吸引更多企業進駐九龍東。