【Emily】多部門大澳演練水浸應變

【明報專訊】踏入雨季，離島民政處噚日聯同消防處、警方、天文台、渠務署等部門及地區機構，喺大澳舉行嚴重水浸模擬救援及疏散演練。根據緊急應變安排，當天文台預測大澳海平面高度可能喺未來數小時內達到海圖基準面3.3米或以上時，大澳嚴重水浸緊急應變計劃就會啓動，天文台會透過手機短訊向政府相關部門、機構、大澳居民代表及漁民代表發預警。

民政處接獲預警後，會啓動設喺大澳鄉委會嘅緊急事故協調中心，協調疏散、救援及緊急支援；​居民代表及漁民代表會廣傳信息，提醒街坊提高警覺，並協助佢哋前往安全地方暫避；而設喺大澳鄉委會、基督教女青年會大澳社區工作辦事處、佛教筏可紀念中學嘅臨時庇護中心，以及位於龍田邨嘅臨時收容中心亦會開放。