【Emily】榕樹頭節 推木頭車運生果賽有選舉

【明報專訊】油麻地街坊會聯同區內多個商會主辦嘅「第六屆油麻地榕樹頭節2025」噚日舉行，重頭戲係果欄木頭車競技賽，觀眾見證參加者扮鬼扮馬「生果狂奔」激鬥 ，今年活動加入民選成分，設「最受歡迎木頭車」大獎，由現場觀眾一人一票投選最具創意木頭車。同日有本地文化表演、文創市集，晚上有敬老盆菜宴。今屆榕樹頭節以「承傳歷史．擁抱未來」為主題，為18區日夜都繽紛活動之一。

通州街橋底時裝騷 冀振地區經濟

至於相隔唔太遠嘅深水埗，前晚（17日）同噚日喺深水埗通州街天橋底活動空間舉行「尋『埗』市集—香港衣櫥」時裝表演及時裝市集，由模特兒演繹20件來自香港知專設計學院學生及非牟利環保時裝品牌Redress嘅時裝設計作品及二手衣著，希望藉此帶旺人流、提振地區經濟，同時推動區內設計集群樞紐嘅發展。