【明報專訊】路政署同北區民政處合作喺北區美化兩條行人隧道，繼上水馬會道隧道美化喺3月底完成後，本月初粉嶺聯和墟聯興街嘅隧道都做美化，佈置成一條「時光隧道」。民政事務總署噚日係facebook出帖，提到新佈置嘅呢條隧道位於三級歷史建築聯和市場隔籬，因此從聯和市場嘅歷史獲得靈感，將隧道變身「時光隧道」，用北區嘅百年變遷及地標嘅今昔相片製成壁畫，畀街坊對照同了解北區歷史。
民政總署話，隧道美化工程完成唔夠一個月，吸引咗唔少經過嘅市民駐足欣賞同打卡，又提到上星期北區區議會開會時，與會者都有讚賞行人隧道美化工程嘅成效；而隧道旁邊嘅聯和市場就喺前年完成活化，變身「聯和市場—城鄉生活館」。
