【Emily】基本法國安法測試 設網約時段即日知成績

【明報專訊】所有公務員職位嘅入職條件之一，係必須喺《基本法及香港國安法》測試及格，以往考生要喺指定日子到指定試場應考，但公務員事務局話，學位或專業程度職系嘅申請人即日起喺網上預約考試時段，之後去一般職系處招聘中心用電腦應考就得，仲可以即日收到成績。

由今日開始，申請人透過局方網上系統，可預約5月23日至7月16日嘅考試時段，之後嘅考試名額會喺考試日前8星期開放接受報名。每個工作天有6個時段選擇，每人只可預約一個時段，預計每年名額約6萬個。非學位或非專業程度職系嘅申請人，測試安排維持不變。

公務員事務局長楊何蓓茵話，新做法可慳到文書處理時間，考生更可隨時預約自選合適時間測試，不再局限以往每年3次嘅測試周期或用紙本應考，仲即日收到電郵通知成績，更快捷方便。