【Emily】繁榮峰會學者傾AI 吳恩達：現學寫code最佳時間

【明報專訊】人工智能（AI）大行其道，AI專家、史丹福大學電腦系客席教授吳恩達（Andrew Ng）話，過去幾年有人建議大家唔使再學寫code（電腦編程），但佢話𠵱家先係學寫code嘅最好時間，他日回望就知呢類建議「會係歷來最差嘅求職建議」。

吳恩達以視像出席全球繁榮峰會時話，唔單止軟件工程師可學寫code，佢舉例，自己公司嘅財務總監已寫code追蹤投資變化，法律顧問助理就用code自動寫保密協議，連公司門口接待嘅職員都有學。

王于漸籲咪成日同AI講嘢

出席同一活動嘅港大首席副校長王于漸講笑話，要同AI相處，就係唔好成日同AI講嘢，「要出去過下真實生活同多元世界，去旅行、（笨豬跳）懸崖跳落嚟，同真人同真事相處」。佢話最唔好係令下一代只對住電腦屏幕，認為政府同學校都應該將唔同生活體驗加入教育。