【Emily】旅發局邀木村光希宣傳香港

【明報專訊】旅發局近年不斷邀請全球各地知名藝人同KOL拍片宣傳香港，日劇天王木村拓哉嘅細女木村光希日前應邀嚟咗香港，去咗中上環一帶坐「叮叮」，又去搭「張保仔號」睇維港夜景。光希噚日喺Instagram發文，話香港係佢最喜歡嘅城市之一，形容總係喺香港搵到新事物同靈感。

喺Instagram坐擁逾360萬粉絲嘅木村光希早前去咗搭電車，感受香港熱鬧城市嘅氛圍，之後去中環「大館」參觀當代藝術展覽，並「落區」瓹窿瓹罅，拍攝藏於街頭嘅壁畫，最後登上傳統中式帆船「張保仔號」，欣賞世界級維港夜景。光希話，香港每一個角落都藏着讓人驚喜嘅靈感，大讚香港每個瞬間都如電影場景般迷人，讓佢每次到訪都渴望探索更多唔同體驗。

旅發局話，希望透過光希呢位年輕時尚偶像嘅視角，引領新一代旅客探索香港獨特嘅中西文化薈萃同標誌性天際線，藉由動人故事同精彩影像，鼓勵旅客遊歷香港，追尋屬於自己嘅夢想同憧憬。