【Emily】《大狀王》8月再登西九 暫13場

【明報專訊】已兩度公演嘅港產原創粵語音樂劇《大狀王》，即將喺上海同北京公演，西九文化區噚日話，完成內地巡演後，8月中會第三度喺西九文化區戲曲中心上演，暫定有13場，香港站早鳥優惠門票嘅發售詳情稍後公布。

根據西九文化區資料，《大狀王》香港站將喺8月14日至24日上演，票價由360元至880元不等。睇番2022年同2023年上演時票價，最貴門票分別係500元同680元。

內地巡演首站下個月喺上海上演，原定10場，上個禮拜再加開兩場，北京站就7月喺北京天橋藝術中心上演10場，全部廣東話演出。西九文化區管理局表演藝術行政總監譚兆民話，好高興套劇今年可以再次上演，仲去到內地巡演，希望日後《大狀王》可以代表香港再走得更遠。