【Emily】邵逸夫獎擬2027加應用科技獎項

【明報專訊】一年一度嘅邵逸夫獎下周公布得獎名單，現時分別設「天文學」、「生命科學與醫學」及「數學科學」3個組別。邵逸夫獎基金會主席陳偉文噚日透露打算加多個組別，新獎項會同應用科技相關，𠵱家仲喺搵評判等籌備階段，又要去路演向國際介紹，預計2027年先會有4個獎項組別。

美國總統特朗普上場，中美關係緊張，陳偉文話佢哋頒獎畀歐美學者時，有外國政府嘅人會問獎項背景，當知道係純私人基金獎項後，問題唔大。佢話籌備中嘅第四獎項涉及AI等範疇，甄選得獎者時會盡量搵做前期基礎研究嘅學者，避免畀人覺得敏感。

邵逸夫獎得獎學者除咗有120萬美元（約936港元）獎金，仲有一塊足金金牌，原來呢塊金牌重12安士，由於近期金價升，基金會話造價要幾十萬元。

頒獎禮以往11月喺灣仔會展舉行，但今年提早喺10月，原因之一係11月香港協辦全運會，租場唔易，索性提早。