【Emily】曾俊華緬海運戲院 「意料中嘅無可奈何」

【明報專訊】屹立尖沙嘴逾半世紀嘅海運戲院下星期一（6月2日）結業，前財政司長曾俊華都曾經係座上客。佢話對戲院執笠感到唏噓，憶述1980年代初回流後住喺九龍，當時本港設備裝潢比較好嘅戲院唔多，而海運戲院絕對係「院大、座位舒服」嘅一間，所以成日同太太去睇西片，「留低過唔少腳毛」。

曾俊華噚日喺facebook發帖分享觀影心得，提到自己係鍾意透過大銀幕睇戲嘅標準戲迷，但「好多時入場，見到場內得小貓三四隻」，所以都知道嚟緊陸續會有戲院捱唔住。佢又話，對於海運戲院結業，「唏噓之餘，亦都可以話係意料中嘅無可奈何」。佢亦分享最近入戲院睇湯告魯斯嘅職業特工隊系列第八集《職業特工隊：最終清算》。

嘉禾院線上周三（21日）公布旗下海運戲院結業消息，話海運戲院「陪伴一代又一代影迷，見證不同電影年代嘅時光流轉」，下星期一租約期滿結束營運，院線會喺下星期日晚上映「經典電影盲盒場」，並推出優惠答謝影迷。