【Emily】出席國際調解院儀式 王毅今抵港 行程密

【明報專訊】中共中央政治局委員、外交部長王毅將出席周五舉行嘅《關於建立國際調解院的公約》簽署儀式，據Emily了解，王毅今日抵港，出席聽日喺灣仔君悅酒店舉行嘅儀式。簽署儀式有60個國家、20個國際組織代表出席，儀式後特首李家超中午會喺禮賓府宴請王毅，聽聞幾個司長屆時都會出席。

王毅今次訪港可謂行色匆匆，今日抵港後，晚上就會出席喺外交部駐港公署舉行嘅晚宴，估計係宴請出席簽署儀式嘅各國代表，李家超都會出席。王毅周五出席簽署儀式，中午出席禮賓府午宴，聽講周五晚或周六早上就會離港。

律政司長林定國噚日接受媒體訪問就話，期望喺今年底至明年初，國際調解院可正式開始運作。佢話簽署公約嘅國家涵蓋亞洲、非洲、拉丁美洲和歐洲，總人口逾20億，佔全球約四分之一人口，相當具分量，而公約簽訂後亦歡迎其他國家繼續加入。