【Emily】美心港燈合辦料理賽 鼓勵「惜食」

【明報專訊】為推動惜食減廢，美心集團同港燈合辦「你真惜食﹗」×「綠得開心計劃」創意料理大賽，鼓勵公眾發揮創意，喺烹煮過程中充分利用食材，並將剩餘食材轉化成新菜式。美心集團首席營運官（香港及澳門）蕭德威話，得獎作品有機會被製成該公司產品，亦會被收錄喺電子烹飪書中畀市民參考。

美心同港燈噚日舉行活動啟動儀式。蕭德威話，美心集團早前邀請旗下廚師發揮創意，善用剩餘食材製作新菜式，部分今年6月起喺集團指定餐廳推出，其中一款辣椒油以剩餘麵包發酵及烘焙後製成嘅麵包粒製作，做到源頭減廢。港燈董事總經理鄭祖瀛話，港燈轄下食堂引入廚餘機，將廚餘化為液體，所以整體廚餘量唔多，港燈喺南丫島嘅電廠更會用廚餘機處理剪咗嘅草，園林廢物都有用。

出席活動嘅環境及生態局副局長黃淑嫻致辭時話，廚餘佔香港都市固體廢物約三成，係各種廢物之中最大類別，環保署積極推行廚餘收集，今年會喺社區大幅增設更多智能廚餘回收桶及公眾廚餘回收點，方便公眾回收。