【Emily】古洞站首道玻璃幕牆竣工

【明報專訊】政府近年大力推動北部都會區發展，包括興建鐵路北環線，第一階段係喺東鐵線興建古洞站。港鐵喺facebook公布，古洞站嘅第一道玻璃幕牆已經安裝好，之後會陸續安裝月台幕門，又話工程團隊仲利用夜晚嘅非行車時間，喺唔影響東鐵線日常運作下，「靜靜雞」改裝地底隧道層月台。

古洞站嘅主體工程喺2023年展開，目標喺2027年完成整個項目工程。等北環線古洞站隨後落成，乘客就可以喺古洞站轉乘東鐵線及北環線。港鐵話會分階段安裝古洞站嘅門頂控制箱、玻璃幕牆、月台幕門，同埋安裝機電設備同系統。

港鐵叫乘客考吓自己眼力，由上水站搭車去落馬洲站時，數吓一路安裝緊幾多道玻璃幕門。

港鐵形容，下一步安裝晒月台幕門，會係古洞站項目另一個重要里程碑。