【Emily】創意思維世界賽 中三生「機械狗話劇」奪亞

【明報專訊】香港近年鼓勵學校推動STEAM教育，沙田佛教黃允畋中學2009年起就參加「創意思維比賽」，今年派出7名中三同學參賽，憑一套以寵物狗為老人家服務嘅8分鐘原創話劇，不單喺香港區賽奪冠，仲代表香港喺今個月美國密歇根州立大學舉行嘅「創意思維世界賽2025」，喺嚟自美國各州、瑞士、內地、波蘭及墨西哥等地共46隊參賽隊伍中獲得亞軍。

帶隊老師王家駒同Emily講，今次參加初中組嘅同學全部都係首次參加，包括相關學會成員、老師推薦加入成員等。參加同學嘅參賽題目，要求隊員設計一個原創話劇，必須包括一個自創嘅動物機械裝置，並完成提取、遮蔽物件同模擬放煙花效果呢3個指定任務。

同學仔就以氣球、水火箭及氣壓、摩打、齒輪、微動掣、磁石等做一連串以電路接駁嘅連鎖反應，配合自創故事，講述地球因科技發展迅速，人口老化日趨嚴重，後生仔遷居其他星球，留低老人家喺地球，於是委派一個動物訓練員去地球嘅老人院工作，用佢訓練嘅寵物狗為獨留地球嘅老人服務。