【Emily】煤氣公司漫畫賽 佳作輯成書送校

【明報專訊】煤氣公司早排舉辦「煤氣綠火焰『漫遊生態世界』四格漫畫親子創作比賽」，收到近千份作品。其中得獎同入圍作品集結成書，送畀超過40間小學，希望成為學校輔助教材。

煤氣公司「煤氣綠火焰能源科學家培育計劃」今個學年主題係「生物多樣性」，今次比賽鼓勵學生同家長表達對人同自然和諧共處嘅盼望，初小組冠軍創作出「Gas俠」角色，推廣保護生物多樣性，高小組冠軍就以畫表達多個日常生活低碳貼士。優異作品集加入咗增潤內容，例如介紹綠色能源應用項目、本港生態環境、動物冷知識，並送畀參與計劃嘅學校。

得獎同入圍參賽者上月亦獲邀參加海洋公園「保育之旅」，可以近距離見到海豚、海豹等動物，聽護理員講解動物身體結構、飲食習慣及護理技巧等。