【Emily】細路仔一喊就提醒 林琳話圖書館太嚴

【明報專訊】唔少家長都會帶小朋友去公共圖書館睇書，民建聯立法會議員林琳話，好多圖書館都有兒童設施，但見過有小朋友一喊，管理員立即提醒唔可以喊，「一定要靜英英，一啲聲都無嘅狀態」，形容元朗屏山圖書館係「重災區」，質疑管理過嚴。

康文署：考慮新館分靜態活動區

康文署噚日喺立法會工務小組委員會會議話，因華富邨重建而受影響嘅薄扶林公共圖書館，擬重置於雞籠灣北公營房屋用地，並計劃日後定位為社區聚腳點。林琳認為圖書館要成為社區聚腳點，就會有小朋友設施，所以關注康文署點樣管理。

助理康文署長（圖書館及發展）李子俊認同小朋友去到兒童設施「無可能一粒聲都唔出」，目前管理已相對寬鬆，不過會再提提同事，並考慮喺新圖書館分隔開靜態閱讀區同活動區，滿足各方需要。