【Emily】體貼照顧罕病台客 城巴車長獲嘉許

【明報專訊】輪椅人士要出門旅行唔容易，近日有一名台灣媽媽喺社交平台Threads分享，話日前帶患有罕見病、需靠輪椅行動嘅囝囝來港旅行，其間遇到一名熱心城巴司機，大讚司機全程溫柔體貼，仲話今次體驗令佢感受到香港嘅「不一樣」，囝囝感受到「被重視」嘅溫暖。

台灣葉媽媽拍片分享，話上月帶19歲、因患罕見病而半癱瘓嘅囝囝忠瀚嚟香港旅行，其間搭城巴15號線巴士由中環上山頂觀光，當日巴士司機同站務助理好熱情咁幫忙推輪椅上車同幫忠瀚綁好安全帶；山路上到一半，司機特登停車幫忙檢查多次係咪安全，到站後率先安排忠瀚落車。葉媽媽話，出發前本來好抗拒，擔心香港巴士車長好惡，但呢位司機嘅行為「暖心到令人感動」。

城巴噚日向當日出手相助嘅司機、沃大地車長頒發感謝狀，表揚佢說好香港故事。沃車長形容係「份內事」，希望呢份正能量可感染他人，又話期待忠瀚一家下次訪港再為佢哋服務。