多名立法會議員噚日（11日）協助一個本地農場購入逾百個西瓜，避免農場因熱帶氣旋「蝴蝶」逼近，打風而血本無歸。環境及生態局長謝展寰噚日亦到場支持，但佢無即場購買，但原來局長離開後，私下都有去訂購4個西瓜以示對本地農友支持。
多名議員早前訂購西瓜，西瓜噚日送到，議員們親身取貨，謝展寰都有現身支持，但係未有即場購買，Emily當時問佢會唔會買西瓜，佢並無回應，大家都以為佢無買。謝展寰事後透過新聞秘書向Emily澄清，當時曾向農場東主了解可以點樣支持，但由於西瓜需要預先訂購，無得即時購買，所以之後再向農場訂購咗4個西瓜，亦已送到佢嘅辦公室，與同事一齊分享。
