【Emily】冒險樂園fb 除名「美國」

【明報專訊】係港人童年回憶嘅室內遊樂場「美國冒險樂園」噚日更新facebook專頁，將個名入面「美國」兩字刪走，改為「冒險樂園」，英文名亦由「JUMPIN GYM U.S.A」改為「JUMPIN GYM」，標誌（圓圖）就沿用黃色底。不過，冒險樂園官方網站同門市就未見改名。

噚日改名帖文一出，隨即引嚟網民留言，有人認為「個Logo設計得好差」，亦有人笑稱「日本城」係咪都要改名，而fb「美國冒險樂園關注組」亦有成員發文笑稱「群組要唔要改名？」睇番冒險樂園fb，其實禮拜二嘅帖文已改咗名同標誌。

翻查知識產權署網頁，「動感娛樂有限公司」喺上月29日提交只有「冒險樂園」4字嘅商標註冊。據公司註冊處資料顯示，動感娛樂嘅董事係陳國華同陳國富，股東分別係「JUMPIN GYM U.S.A. GLOBAL INVESTMENTS LIMITED」同「JUMPIN GYM U.S.A. INVESTMENTS LTD」。