【Emily】回收17.9噸衣物 Redress辦「分類馬拉松」

【明報專訊】「速食時裝」改變消費模式，亦造成大量浪費。本地環保組織「Redress」今年續辦「衣物再生月」，上月同企業、院校及零售商合作，喺全港超過120個收集點，回收市民唔要嘅舊衫。

Redress噚日起舉辦一連3日「衣物分類馬拉松」，將今年收集到嘅17.9噸衣物分成25類，然後捐畀慈善機構、轉售或降級回收，本月24日至29日會喺鰂魚涌舉行「期間限定」二手店，轉售畀市民。

Redress自2018年起舉辦「衣物再生月」，今年以「你的衣物編織着我們的未來」為主題，期望本港消費者重新思考衣物同環境嘅關係，探索可持續時尚生活方式。

佢哋舊年收集到17噸衣物，約六成轉贈慈善合作伙伴，約兩成五降級再造為拳擊袋填充料，另約一成轉售，最終僅1%舊衫被送到堆填區。