經濟
CEO陳翊庭運送「金鑼」 慶祝港交所25周年
【明報專訊】話說港交所（0388）喺YouTube上載條影片，行政總裁陳翊庭（Bonnie）化身成為跟車司機，將「金鑼」由金融大會堂搬上流動宣傳車。小琴發現原來Bonnie係為咗港交所，慶祝25周年而推出嘅「金鑼巡禮」活動做宣傳。港交所就話，平時只係喺香港金融大會堂上市敲鑼儀式睇到嘅「金鑼」，將會由下星期五（20日）至7月3日，由流動宣傳車「金鑼巡遊號」運到全港9個地點展示。
9地點展示 訪客可著紅背心扮交易員
港交所話，「金鑼巡遊號」會駛入嘅9個地點，包括中環、西九、鰂魚涌、沙田、將軍澳、灣仔、啟德、葵涌同尖沙嘴。宣傳車除咗會展示「金鑼」之外，仲會展示其他平時喺香港金融博物館嘅展品，而訪客仲可以著上紅背心，扮演活躍於1980年代嘅「紅衫仔」交易員。另外，亦會設互動遊戲，考驗關於香港金融市場嘅歷史知識。
