【Emily】簡屋辦「爸爸艾粒U」活動 鄧家彪籲遠離劣質劏房

【明報專訊】噚日父親節，房屋局長何永賢噚日喺社交平台facebook提到，元朗攸壆路簡約公屋上周五舉辦「爸爸艾粒U」活動，提前慶祝入伙簡約公屋後首個父親節。身為父親嘅立法會議員鄧家彪就喺帖文留言，趁機呼籲「愛護子女嘅父母」應該遠離劣質劏房，揀選簡約公屋。

何永賢話，副局長戴尚誠Victor到場參加「爸爸艾粒U」活動，見證一眾孝順仔女自製禮物送畀父親，例如有小朋友喺拖鞋上畫畫，有小朋友整雞蛋仔。佢強調當局會繼續努力落實其他簡約公屋項目，為更多家庭加添幸福感。

鄧家彪喺局長帖文下留言，話簡約公屋單位唔大，但遠勝「難展手腳、空氣混濁、難言安全」嘅劏房，希望政府陸續推出更多簡約公屋，同時呼籲為咗子女健康成長，劣質劏房居民應該揀選簡約公屋。