【Emily】母乳庫開幕 已惠120個BB

【明報專訊】香港首個母乳庫今年1月成立，接收母乳捐贈，3月開始供應母乳畀極早產同患危疾嘅初生嬰兒。醫管局噚日舉行母乳庫開幕禮，醫管局主席范鴻齡話，截至6月9號已有230幾名登記母乳捐贈者，收集咗900公升母乳，已經有120個BB受惠。

累計收900升人奶 幾達一年目標

醫衛局長盧寵茂就話，母乳庫喺唔到半年間收集嘅母乳就差不多達到第一年收集1000公升嘅目標，令人鼓舞，多謝所有捐贈者，希望繼續傳遞「幼吾幼以及人之幼」嘅母愛。

唐太一對雙胞胎女兒係32周早產兒，今年3月一出世就被送到新生兒深切治療部（NICU）。唐太記得，見到BB全身綁住好多維生儀器時忍唔住大喊，亦好擔心早產會對BB成長帶來風險。

唐先生話兩公婆最初對接受捐贈嘅母乳有偏見，擔心衛生問題，但得知餵母乳畀BB可以減低早產兒患壞死性腸炎風險時，「唔好諗喇，即刻簽同意書」，接受母乳捐贈。唐太現已成功追到奶，更明白每隔兩三個鐘就要泵奶嘅辛苦，多謝捐贈母乳嘅媽媽無私地幫助其他小朋友。