【Emily】蘿蔔快跑自動駕駛准東涌測試

【明報專訊】自動駕駛車即將可以駛入市區。運輸署噚日更新百度旗下「蘿蔔快跑」喺香港嘅自動駕駛車輛先導牌照，批准百度將自動車測試範圍擴展到東涌，自動車可以喺每日凌晨1點至5點，以及朝早10點至夜晚10點喺東涌做不載客測試。

部分路段要改手動

按最新牌照，百度獲批可以安排10架自動車喺東涌指定路段同時段測試，不過每次最多只可以有3架車同時行駛。自動車有兩條指定行駛路線，分別途經文東路、東涌東交匯處、東涌海濱路等（見圖），基本上唔可以入社區小路，只喺富東邨、藍天海岸、映灣園等屋苑外圍行駛，部分路段亦要改用手動模式。所有自動車車身會有標籤，畀其他道路使用者識別，車上亦會有後備操作員。

運輸署舊年11月發牌畀百度測試自動車，測試範圍只限機場同航天城附近，今次係第一次駛入社區。署方話擴展測試範圍係為收集更多有用數據，評估自動車喺更多不同路况同社區嘅表現。百度話，自動車喺香港累計行駛1.5萬公里，一直零事故，反映自動車喺香港不同道路場景表現穩定，未來會喺政府指導下有序推進測試同應用，為市民同遊客提供新選擇。