【明報專訊】29歲港產鋼琴家沈靖韜本月初喺「范克萊本國際鋼琴比賽」攞到金獎及觀眾大獎，有關注古典音樂嘅樂迷，相信都會好想現場欣賞呢位首個喺四大古典鋼琴比賽奪金嘅本地鋼琴家演奏，𠵱家就有機會喇。沈靖韜獲香港電台邀請，將會喺7月1日下晝5點，去到港台一號錄音室參加「凱旋回歸：沈靖韜樂聚第四台」活動，屆時沈靖韜會即場演奏，並分享參賽經歷同音樂點滴。
活動門票喺今日中午12點起透過港台第四台網頁免費派發，港台第四台話，舊年沈靖韜錄製嘅節目《我的布拉姆斯全集》，演奏晒布拉姆斯所有具作品編號嘅鋼琴獨奏曲，並以聲音導航，讓聽眾欣賞經典音樂嘅魅力，節目現已上載到港台第四台網頁，畀樂迷隨時重溫。
