【Emily】消防出緬甸地震救援相冊 炎熱搜救難 塗傳統護膚品防曬

【明報專訊】緬甸今年3月發生7.7級大地震，特區政府喺地震翌日派出救援隊去當地，喺11日搜救行動中，救出一名生還者，並搵到兩名罹難者嘅屍體。消防處為行動製作咗共約130頁嘅救援相冊，分成6個章節，涵蓋動員準備、救援過程及使用裝備等內容，市民稍後可以去公共圖書館借嚟睇。

相冊以救援隊喺瓦礫搜救嘅一幕做封面，仲有立體裂痕設計模仿地震嘅破壞。消防處話，製作相冊目的係記錄行動重要歷程，象徵無畏艱險及迅速行動嘅精神。呢本相冊名為《救援無疆界》，沿用前年救援隊到土耳其地震救援嘅相冊名稱。

消防處話過，當地天氣炎熱增加救援難度，相冊提到有災民向隊員送上飲料補充體力，亦有災民送上平安符表達謝意。緬甸傳統使用名為「檀娜卡」嘅皮膚護理用品，有防敏感同防曬功能，相冊顯示有商會義工為隊員塗上檀娜卡。

公共圖書館可借閱 電子版上載

救援隊一行51人，消防處同Emily講，會派發相冊畀每個成員，亦會送畀曾喺行動中支援嘅機構同組織。市民稍後可以到公共圖書館借閱，處方亦會將電子版上載至網頁，詳情稍後公布。至於製作費，消防處就未透露。