【Emily】《大角嘴好釉》展廢料製釉陶藝

【明報專訊】大角嘴曾以五金業聞名，至今仍保留多間五金舖同傳統工藝文化。由香港藝術中心主辦、市區更新基金贊助嘅社區藝術項目「轉角」，喺奧海城2期露天廣場舉辦展覽「轉角：《大角嘴好釉》」，展出一系列以社區回收廢料研製嘅陶藝釉藥作品，展期至8月8日。

作品由藝術家團隊「香港釉藥研究」策劃同製作，利用咖啡渣、衣紙灰、金屬碎片等回收物料，研發出本地釉藥，製成陶瓷餐具、牆磚、小型家具等。作品靈感嚟自社區生活，重點展品包括一件由多種釉藥合製嘅小型座椅，原料用咗咖啡渣、衣紙灰；仲有以咖啡渣整成嘅陶瓷、洪聖廟衣紙灰製成嘅陶塔，同埋用配匙舖產生嘅銅粉製成嘅雕塑。

另外，今個月29號會有兩場展覽導賞，除咗由藝術家介紹藝術品外，仲會帶參加者漫遊大角嘴，了解釉藥來源。