【Emily】陸頌雄何啟明清華EMPA畢業 陸：心情灼熱如北京陽光 何：真係學到嘢

【明報專訊】近年唔少政界人物及公務員報讀北京清華大學高級公共管理碩士（EMPA）課程，課程噚日喺北京舉行畢業禮，今屆畢業生包括工聯會立法會議員陸頌雄及副勞福局長何啟明等。陸頌雄話經過四年奮鬥迎來畢業，心情好似噚日北京陽光一樣咁「灼熱」。佢同Emily講，課程要求高，同學間會交流吓搵資料嘅心得，分享學術規範要求，最重要係有非常好嘅同學常常提醒佢交功課死線，講笑話無同學嘅溫馨提示同鞭策，佢可能畢唔到業。

陸頌雄同Emily話，清華幾個公管課程合共60多名港生，包括工聯會幾名黨友。佢話讀書過程雖辛苦，但「經歷一個精彩的學習過程，成就個人提昇」，有少少可惜嘅係，由於新冠疫情，有超過一半課程需上網課，覺得唔夠過癮。其論文題目同香港工時規管立法有關，佢話希望研究成果能豐富新時代新工運嘅理論基礎，促進香港工時規管制度改革。

狄志遠到賀黃俊瑯畢業

何啟明就同Emily講，疫後工作量大咗好多，要兼顧學業都吃力。以前喺中大主修哲學嘅何啟明話自己文科底，今次學習公共管理，真係學到嘢，而修讀課程會更理解公務員同事處事嘅角度和顧慮，對工作有幫助。

新思維立法會議員狄志遠就好有愛，飛咗去北京出席黨友黃俊瑯喺清華嘅畢業禮，話恭喜黃俊瑯學有所成，將來有更聰明智慧推動社會進步。