【Emily】內地記者團採訪港交所 儀器問題生「小插曲」

【明報專訊】中華全國新聞工作者聯會噚日組織第四場粵港澳媒體灣區行聯合採訪活動，即安排內地記者來港採訪官員及機構，包括Emily在內嘅部分香港記者獲邀隨團參加。記者團噚日下晝去拜會港交所時發生「小插曲」。

記者團去到中環港交所，獲安排一個會議廳同港交所人員交流，記者採訪場通常設有俗稱「Sound Box」嘅音源分配器，供電子傳媒收音，惟噚日現場無提供設備，中央電視台攝影人員與港交所職員爭論，認為安排儀器做法較好，最後佢提出港交所人員喺會議廳外擺「咪兜」供拍攝及收音訪問，先至解決問題。現場港交所工作人員就話，雖然事前已收到記者團嘅問題紙，但一直以為大家只係嚟交流。

記者團首場先去政府新聞處，同署理財政司長黃偉綸為首嘅3名官員見面，香港新聞聯同事提前兩日喺「WeChat」群組向團員收集採訪問題，噚日現場放咗幾排座位，有記者不以為意坐喺頭排，被告知座位已預留，其後Emily發現，坐頭排者都係事先交咗問題、獲安排發問嘅行家，坐後排嘅記者雖然努力舉手，但大會都以時間有限為由未能爭取到提問機會。