【Emily】中大民調：四成感貧富懸殊比5年前嚴重

【明報專訊】香港貧富懸殊問題一直存在，中大香港亞太研究所最新民調顯示，七成受訪者認為香港貧富懸殊問題嚴重，43.6%更認為情况比5年前嚴重，比舊年調查上升3.2個百分點。

中大喺5月6日至20日期間電話訪問702人，問到家庭收入係咪足夠應付日常生活開支，9.9%受訪者話「不足夠」，同舊年嘅10.2%相若。不過，受訪者普遍對未來5年香港貧富懸殊情况唔係好樂觀，認為會更嚴重嘅佔38.3%，比舊年多3.7個百分點；認為差唔多嘅就接近四成。

逾半肯交多啲稅助窮人

同舊年一樣，最多受訪者覺得貧窮嘅主要因素來自社會，其次係個人，認為政府應該做更多工作去解決貧富懸殊問題嘅受訪者佔八成，超過一半受訪者同意交多啲稅去幫助窮人。